მოქმედებს თუ არა მომზადების წესი პროდუქტში შემავალ ვიტამინებსა და მინერალებზე

როდესაც პირველ ნაბიჯებს ვდგამთ ჯანსაღ კვებაში, ვცდილობთ, ყველაფერი სწორად და ზედმიწევნით გავაკეთოთ. ვიკვლევთ რა მივირთავთ, როგორ და რა ფორმით. ასეთი პედანტური მიდგომა ხშირად იწვევს სტრესს, გვაბნევს და შესაძლოა ჯანსაღად კვების მოტივაციაც დაგვაკარგვინოს.

ინფორმაცია იმაზე, თუ როგორ მოქმედებს მომზადების წესი პროდუქტში შემავალ ვიტამინებსა და მინერალებზე საკმაოდ ბევრი და მრავალფეროვანია. ზოგიერთი წყარო გვირჩევს ხილ-ბოსტნეული უმად მივირთვათ, ზოგიერთი მიგვითითებს ორთქლზე ხარშვის მეთოდის უპირატესობაზე, ზოგი გვირჩევს ტაფა გრილით ჩავანაცვლოთ და ასე შემდეგ.

ამან შეიძლება დაგაბნიოთ და ჯანსაღი კვების დანერგვის სურვილიც კი დაგაკარგვინოთ. თუმცა, ყველაფერი ასე რთულად როდია. ის, თუ როგორ მოვამზადებთ საკვებს: მოვხარშავთ, შევწვავთ, ორთქლზე დავამზადებთ თუ გრილზე, ნამდვილად მოქმედებს მასში შემავალ ნუტრიტებზე; მაგრამ ეს არ ნიშნავს, რომ რომელიმე მეთოდზე უარი უნდა ვთქვათ.

მომზადების ფორმა პროდუქტზე, ერთდროულად დადებითადაც მოქმედებს და უარყოფითადაც

ხილი, ბოსტნეული, ხორცი და სხვა პროდუქტები სხვადასხვა ტიპისა და რაოდენობის ნუტრიტებს შეიცავს. საკვების მომზადების ერთმა მეთოდმა შეიძლება ერთი ნუტრიტის ათვისების შესაძლებლობა შეამციროს, სხვა რომელიმესი კი – გაზარდოს.

მაგალითად, თუ პომიდორს 30 წუთის განმავლობაში გავაცხელებთ, მასში შემავალი C ვიტამინის რაოდენობა შემცირდება, რადგან ის წყალში მარტივად იხსნება. სამაგიეროდ, ტემპერატურის მომატება გაზრდის პომიდვრის ანტიოქსიდანტურ ნივთიერებებს.

პომიდორი გამონაკლისი არ არის. მომზადების დროს სხვა ხილ-ბოსნტეულიც ასე იქცევა. მათში შემავალი ნივთიერებები, მაგალითად C და B ჯგუფის ზოგიერთი ვიტამინი წყალში მარტივად იხსნება, ამიტომ მოხარშვასთან ერთად, მათი რაოდენობა მცირდება. სამაგიეროდ, იზრდება პროდუქტების ანტიოქსიდანტური თვისებები, რაც არანაკლებ საჭიროა ჩვენი ორგანიზმისთვის.

მომზადების მეთოდები განსხვავებულად მოქმედებს პროდუქტში შემავალ მინერალებსა და ვიტამინებზე. თითოეულ მეთოდს აქვს დადებითი და უარყოფითი მხარეები. მაგალითად მოხარშვა ან გრილზე მომზადება საკვებს უფრო გემრიელს ხდის, მაგრამ ამცირებს B ვიტამინის რაოდენობას. მოშუშვა უნარჩუნებს საკვებს ისეთ ვიტამინებს, რომლებიც ადვილად იხსნება ცხიმში, მაგალითად A, D, E და K ვიტამინებს, ამავე დროს, ის ამცირებს ბოსტნეულში C ვიტამინის შემცველობას.

როგორ ჯობია საკვების მომზადება?

როგორც ხედავთ, საკვების ერთი, იდეალური მომზადების მეთოდი არ არსებობს. თუმცა, როგორც ზემოთ ავღნიშნეთ, არ ღირს ამაზე ნერვიულობა. საუკეთესო გზა, რომ ორგანიზმმა ყველა მისთვის საჭირო ნუტრიტი მიიღოს მრავალფეროვანი კვების რაციონია.

მიირთვით სხვადასხვა მეთოდით მომზადებული პროდუქტები: წყალში თუ ორთქლზე მოხარშული, გრილზე თუ ტაფაზე შემწვარი, გამომცხვარი და ა.შ. დღის განმავლობაში მიირთვით უმი ხის-ბოსტნეული. ასე ყველა იმ მინერალსა თუ ვიტამინს მიიღებთ, რომელიც გჭირდებათ.

ქვემოთ მოცემული რჩევები დაგეხმარებათ რაც შეიძლება მეტი სასარგებლო ნივთიერება მიიღოთ საკვებიდან:

• მიირთვით როგორც უმი, ასევე სხვადასხვა მეთოდებით მომზადებული საკვები.
• ბოსტნეულის მოხარშვის შემდეგ დარჩენილი წყალი გამოიყენეთ წვნიანის ბაზად, რადგან ის მდიდარია წყალში ხსნადი ვიტამინებით.
• დაიცავით ახლად-მომზადებული და ხელმეორედ გაცხელებული საკვების მირთმევის ბალანსი. შეგიძლიათ მიირთვათ ორივე, მაგრამ მეორედ გაცხელებული კერძი თქვენი რაციონის 100%-ს არ უნდა შეადგენდეს.
• უმი ხილ-ბოსტნეული კანიანად მიირთვით, როგორც წესი მათში ბევრი ნუტრიტია.
• თუ შესაძლებელია, პოდუქტები მხოლოდ მომზადების შემდეგ დაჭერით, ასე ისინი უკეთ შეინარჩუნებენ ვიტამინებსა და მინერალებს.

ავტორი: მარიამ რუსიშვილი

The post მოქმედებს თუ არა მომზადების წესი პროდუქტში შემავალ ვიტამინებსა და მინერალებზე appeared first on Bloomin.